葉一知
網上跳舞遊戲《勁舞團》香港版發生恐嚇事件，一個網名「反叛．靈」的男子，不滿女友在跳舞比賽中落敗，輸唔起，就在該遊戲的討論區內向其他玩家發放一系列
恐嚇留言。男子態度認真，令不少網友嚇得發呆，其中一個十五歲少年害怕被人點相，嚇至驚失措，其姊發現才向版主投訴，並打算報警。
唔輸得，已係懦夫行為，唔輸得再加恐嚇，然後當自己贏咗嚟自慰，更是懦蟲行為。對於這種人，我們不能低頭，對於反智白痴的恐嚇言論，我們低頭更是自侮。
我們先看看這個「反叛．靈」的恐嚇：
- 邊個再搞BEAT☆……我唔客氣
- 放心@@我唔打女的
- 我都唔想打機搞到打人
- 血流成河吧@_@重演我4年前長沙灣斬人
- 十幾條友斬4條友@@，瘋狂咁斬……見住血流出…勁high
- 俾重案捉2日我咩都冇講
- 四年前我係咁惡
- 銅鑼灣大把人識我，有咩事，一個電話大把人到
除了硬膠，這種恐嚇言論並沒有可怕之處。首先，佢聲明「唔打女」，咁就同「邊個再搞BEAT(佢女友)我唔客氣」有矛盾，一眾女玩家應該團結一致，狂搞阿BEAT，不斷贏佢，咁呢條友都冇你符。如果佢食言，佢仲係男人嚟嘅？對於一個太監嘅恐嚇，有咩好驚呢？
四年前喺長沙灣斬人，瘋狂咁斬，俾重案捉咗咩都冇講就冇事。首先，佢真係當法律同警察係低能，你信唔信斬完人俾人捉到可以大模廝樣行番出嚟？如果差人冇證據隨便拉條友番去，唔講嘢就放得番，又唔見拉我番去審兩日？好啦，就當佢地都係白痴嘅，拉唔到人，咁即係話呢單斬人案到今日係一單懸案，點知你今日走出嚟自爆有份，警察仲唔做嘢拉佢番去？
至於銅鑼灣大把人識佢，係，真係好勁，但係《勁舞團》話有118萬名註冊玩家，但係銅鑼灣冇118萬人喎！既然玩家分佈全港，你淨係銅鑼灣多人，咁冇用喎，因為玩得都係網民，你對佢地幾近一無所知，要點相就要走齊全港十八區，吹水就易，除非你係指喺網上虛擬斬人啦。
各位小朋友，如果你夠冷靜，可以獨立思考，就唔使驚呢啲咁嘅恐嚇言論。網上言論空間很珍貴，就係有呢啲白痴不斷喺度令佢萎縮，對住個冷冰冰嘅mon就大大膽，換咗喺現實生活，又係蟲一條。
P.S. 你係女先好留言，唔係佢一陣搵到嚟點你相唔關我事。
