葉一知
報載，一家中學一直將中一教科書內有關性知識和避孕方法嘅內頁撕掉，先至派俾啲學生。該章節內容刊有多幅男女生殖器官手繪圖像，以及避孕套和子宮帽圖片，表達手法平實。但該校主任認為：「後生仔睇咗圖可能有衝動。」
(警告：本文載有可能令後生仔衝動的圖片，如閣下是中學生，請勿打開本文，否則本文作者對閣下可能的性衝動概不負責，並質疑閣下心理變態。)
老師是學生學習的榜樣，老師在學校裏可以做的事，同學們理論上也大可學習，這就是「為人師表，以身作則」。既然老師不想學生睇嘅，可以偷偷撕咗去，學生當然要學習老師嘅身教，例如，份功課有幾條題目唔想做？靜靜雞撕咗去囉；唔想父母睇到差勁嘅成績表？暗啞底撕咗去囉。測驗考試見到唔想做嘅題目？偷偷哋撕咗去囉。
當然，老師做就是對的事，不代表學生做也可以對，因為老師唔係做州官，學生都唔係百姓，所以只許老師放火，不許學生點燈，當然係啱㗎啦。何況，向學生展示悶死人嘅性教育圖片，比偷偷撕去學生真金白銀買嘅課本，顯然前者更為不道德，更不可饒恕吧！所以老師先可以咁理直氣壯。即使，果間係一間教會學校，理論上更加唔應該向學生講大話，但係將學生擁有嘅課本撕咗，又唔話俾學生聽，不能說是欺騙，連主也不會這樣認為。
其實，每次開學前，都要勞煩老師撕百幾二百本書，好鬼煩啫。其實唔使咁煩，嘅，搵盲光社整幾十個投訴，話「灌輸性教育即係鼓吹濫交」，將所有生物課本封膠袋，逼出版社改版，唔係更理想嘅方法嗎？
又或者，喺香港將生殖呢一課，由生物課掉到化學課，話俾學生知，我哋中國人嘅DNA比較特別，通通都係石頭爆出嚟嘅，石頭只要經過光合作用，就會懷孕，其中鵝卵石因為有卵，就特別容易吸收日月之精，爆得最多細路出嚟。所以你喺街見到果啲大肚婆，其實係陀住舊石。又因為中國地大物博，鵝卵石特別多，爆吓爆吓就爆咗十三億人喇。
資訊越嚟越多，青少年性觀念越來越開放，十四歲少女掟女嬰落街，但係香港既無性教育，又無愛教育，社會質素又越來越低，竟然仲有作為學生模範嘅教育人員，認為當睇唔到就唔存在，拒絕性教育都算，仲用合情合理嘅旁門左道呃學生，香港真係越來越進步。
