葉一知
(港島選民:請參考2002年法國總統大選)
觀乎形勢，葉劉淑儀在立法會補選中贏硬。
有好多人話，爭取民主唔應該係民主派嘅專利，所以葉太都可以爭取(但係唔知點解又唔話葉太忽然民主，只話陳太，好矛盾)。冇錯，例如民主建「講」聯盟都係「講」民主，民主凍力都係講民主，只係啲推動力凍結咗。葉劉淑儀當然可以追求民主，唔信我哋睇吓佢政綱點寫：
市民普遍樂於看見香港早日落實優質民主。政制爭拗持續多年，直接影響管治及建設和諧社會。我會致力向政府提倡務實可行的政改模式，同時積極協助凝聚社會共識，爭取中央同意，務求可以在2012年達到雙普選。
據報道，香港中學生的閱讀理解全球第二，咁大家就理解吓以下問題：
優質民主：咩叫優質？有冇劣質民主？係咪選輸咗就劣質，選贏咗就優質？而家呢場補選係優質定劣質？優質民主包唔包括埋優質選民？
爭拗多年，影響管治和諧：民主制度唔係俾人斯斯文文咁去解決爭拗咩？民主制度唔會消除爭拗㗎喎？如果可以，民主國家唔使咁多唔同嘅政黨，成日辯論啦。要管治效率高，要和諧，不如追求獨裁統治。
務實可行，凝聚共識：咩叫務實可行？係咪話，你同老細講，經濟好，公司賺大錢，要加10%人工，但係老闆叫你務實，要諗啲可行嘅加輻——1%啦，冇問題嘅。你班員工好快啲凝聚共識囉喎，吓？七成人話刻薄，係都要加多啲？咁様冇共識喎，唔好加住喇。
爭取中央同意：唔好話葉劉唔好，至少，佢都講咗句真話！不過應改為：乞求中央同意。
葉劉仲提到，要「推廣能夠平衡社會各界利益、務實可行的政改建議方案」，但係佢又建議選特首要有提名門檻，提名委員會要由1800人組成，每名候選人須獲得最少180個提名。又話為了兼顧社會各界嘅利益，每名候選人須同時在每個界別(1. 工商、金融界；2. 專業界；3. 勞工、社會服務、宗教等界；4. 立法會議員、區域性組織代表、香港區全國人大代表、香港區全國政協委員代表)中獲得最少10%(即40或60個)委員提名。
咁多門檻，叫做平衡各界利益？好似佢今次嘅對手蔣志偉，係貨運聯會主席，好想代表貨運業爭取權益，但係喺咁嘅提名機制下，佢點攞10%人大嘅票呀？咁貨運業嘅利益咪得唔到平衡？仲有，咁多界別，各有喜好，個社會咪好唔和諧？
Anyway，我都係講吓笑，唔係challenge葉太及其支持者。我好似近日大部分香港人一樣，我深深相信葉劉係追求民主，因為佢曾經叫我「放長雙眼信佢」。可惜，我冇票可投，只好等佢勝出果日，發表勝利宣言：
葉(舉起V字手勢)：我話過，希特拉都係民主選出嚟嘅，所以大家選我，係明智嘅。
(記者)你係咪會爭取2012年雙普選？
你哋放長雙眼信局長啦。
(記者)你話良心人人有，咁唔投你果啲市民係咪冇良心？
你咁冇禮貌，又唔守規矩，我唔會答你問題。
呢場補選，真係令本人獲益良多。大家都知道，本人寫時事blog，自不然得罪好多人，尤其有啲「政見唔同就當你殺父仇人」的優質港人。過去兩年，可能已有五十萬之一人大叫「葉一知x街」。幸好，葉劉將會勝出，我唔使驚了，我會立即改頭換面，搖身一變成為新的一「葉」(或新的一知)，要忽然愛國，要早日落實優質愛國，致力提倡務實可行的愛國模式。
我知道，大家唔會記得我嘅意見同行徑，因為「忽然」係冇罪的，只要打完人回來認錯，就能贏得掌聲。曾經痛恨我嘅人一定會回來，支持我，擁護我，投我一票，叫我成為MSB天王。葉劉淑儀是新的一葉更出色，而我將會是新的一葉更好色，請各方繼續支持本BLOG。
相關文章:
立法會補選FAQ(庫斯克)
....
