葉一知
陳易希會考12分，連日惹來各界批評，甚麼「沒資格進大學」、「科大睇錯人」、「我咁辛苦讀到14分都入唔到科大」等聲音此起彼落。今日科大校長朱經武都出嚟撐小陳。
觀乎各界批評，就奇怪嘞，唔知係各批評者嘅語文程度太低，定係妒忌心跟邏輯會構成反比關係，大家好似唔多理解「破格」呢兩個字。話明破格，當然就係唔守原來嘅遊戲規則架啦，當初科大見小陳有過人之發明才能，指明破格取錄而唔係條件取錄(conditional offer)，冇話過要小陳考到幾多幾多分、中英數合格晒先收佢，更加唔使理咩14分定8分讀預科嘅資格，否則仲叫咩破格？
破格取錄，正因為睇中小陳得天獨厚，但有可能會考考唔出佢嘅真正才能(會考都冇科學發明科)。何況會考12分，係咪代表小陳特別蠢同懶？唔係，可能係小陳天生是個木獨科學家，又或者根本冇錢，冇幫襯短裙AV補習天后(即以audio & video等視聽器材助教)，冇美女班房嘅協助，英文點合格呀？至於中文喎，你地成班做記者做文字媒體嘅都一定中文合格啦(除非你係破格)，咁又寫啲乜中文出嚟？含吹奶啜囉，惡質食字gag囉(如毒蛇嚇機)，再唔係字都唔寫，去偷拍人換衫囉。
得到破格取錄，當然係一個不可多得嘅機會，陳易希當然要好好珍惜。但佢都未開學，就話「收錯人」，算點？所以如果我係陳易希，我一定開記者招待會，發表以下講話：
「各位，我知道大家好關心我嘅會考成績，好擔心我白白浪費左科大俾我嘅寶貴機會。
我好幸運咁繞過咗填鴨式嘅會考制度，提早進入高等教育嘅門檻，我深深明白呢個機會係千載難逢。我喺度向各位保證，我會加倍努力，唔會辜負科大對我嘅哉培同期望。
今日我深深體會大人成日講嘅成王敗寇。不過，如果入讀大學就係成王，這個成王嘅要求實在定得太低。如果將來我對科學或人類世界能有些微貢獻同推動，功勞都歸於今日一個破格嘅機會。但如果我唔生性，到時請各大傳媒用比今日多一百倍嘅力度狠批我呢個敗寇，我會完全接受。
我嘅強項係科學發明，科學發明沒有甚麼了不起，製造一個機械人，最多令人有更多時間偷懶唔做野，科學發明唔能夠解決「樹大招風」、「槍打出頭鳥」、「輸打贏要」等等嘅心理問題，但仍然希望大家會寬容地畀一次機會我，等我嘅發明可以造福人群，等大家可以懶惰一點。
大家知道，天空上有粒星係以我嘅名字命名，我好開心，但同時亦都不斷提醒自己，只要幾百蚊就可以用自己個名命名一粒星。我無錯係Star，但只係Star Chan，即係星陳。在人間我稍為亮熱了一點，但在無窮嘅宇宙，我仍然只係同大家一樣，只係一粒星塵。
我早排看葉一知和野蟹叔叔嘅刁民公園網誌，知道港大校長徐立之是研究型學生，讀學士時成績也不好。我也聽過李柱銘先生當日入讀港大法律系，係大律師余叔韶老先生資助嘅，李柱銘卻因為某啲原因考左個『推薦畢業』(Recommended Pass)嘅劣績，雖然佢今日係數一數二嘅大律師，但係佢都表示過對不起余老先生的期望。
呢兩個教訓，我都會好好記住。將來嘅日子，我一定會努力，請大家拭目以待。謝謝各位。」
相關文章：
