葉一知
呢排有個「身教」嘅政府宣傳片日播夜播。話說，片裏面有個男童遇到識嘅人會好有禮貌咁打招呼，買嘢找多咗錢又會俾番個婆婆，搭車排隊嘅時候又唔會同啲衰同學一齊打尖。到最後旁白無端有把神秘聲音(唔知係耶穌召喚定係小童撞鬼)問：「小朋友，點解你咁乖嘅？」男童答：「我爹D媽咪平時都係咁架啦，我學佢地之嘛。有樣學樣，一家人吖嘛！」(按此去片)
真係睇到O晒嘴，反智到無倫。
反智，唔係因為佢宣傳身教有咩問題，雖然，幾十年前冇電視宣傳片，啲人都知咩叫身教，今日反而唔知，要由政府教你身教，都係幾反智架啦。
算嘞，時代唔同，就當今日啲家長都質素勁降，唔知咩叫以身作則，由呢個咁高智能嘅政府嚟教。但最反智係佢最後果句tagline——有樣學樣，一家人吖嘛！
當天真無知嘅小朋友聽到呢句話，個個真係有樣學樣，咁就大鑊啦，社會好快就會出現大量小學生模仿「一家人」嘅行為，包括：
- 地鐵道門開左三份一就衝入車廂，瞓身幫一家人霸位
- 見到大肚婆同阿婆死唔讓座
- 一邊鬧一邊期期買孌童雜誌
- 唔識講唔該同多謝
- 無論幫襯乜，總之俾左錢就老奉大吵大鬧，唔理有冇理
- 睇戲聽音樂會等唔會熄手提電話，兼且大聲討論劇情，有如置身屋企睇碟一樣
- 約朋友出街食飯時，有一半時間係拎住個電話同另一個朋友講
- 喺公共交通工具或類似場所以全車都聽到嘅聲量講手提電話
- 上堂/出席畢業禮等等，電話會響，仲要幽默咁講：「一定是我們香港賣廣告的」
- 喺街執到手提電話，第一時間熄機，然後去放機
- 喺公眾場所剪指甲/腳甲/挖鼻……
- 喺公共場所如交通工具打PSP又唔用Headphone
- 喺公共場所用部懶潮嘅MP3電話係咁播歌——當然又冇用Headphone
- 喺寧靜嘅餐廳大聲講話
- 朋友間話題離唔開樓價、股價、波欖、馬仔、女、名牌、食野、shopping
- 有待大家補充
真係唔明，個廣告目的明明係叫家長以身作則實行身教，點解而家成個廣告個視點會去左個小朋友到？個廣告似足拍俾小朋友睇咁，叫佢地「有樣學樣，一家人嘛」，而唔係叫父母點做個好榜樣俾小朋友睇。細路，記住有樣學樣，老豆嫖賭飲吹都要學，一家人嘛！
你估真係天下無不是的父母咩。
講到尾，個廣告原意唔係要教個細路咩叫身教，而應該係教啲大人咩叫身教。小朋友唔使你教，佢都係對住父母親人等有樣學樣，唔通仲會對住阿Donald有樣學樣咩！所以，問題唔係細路仔唔識有樣學樣，而係佢地學習嘅對象都唔係好有家教，先令啲細路越學越叫人嘆息。
政府宣傳片,一向白痴，睇完O晒嘴，呢個尤其嚴重反智，應奪是年十大廣告金草莓金獎。
