葉一知
權力令人腐敗，絕對的權力令人絕對的腐敗——這是針對擁有權力者而言，對於受權力操控的很多中國人來說，這一句話應是「權力令人弱智，絕對的權力令人絕對的弱智」。
六四廿周年真是一面照妖鏡，姓資姓社照不到，姓弱的卻照出一大堆。但這次發表偉論的人不姓弱，據說是甚麼「香港青年發展網絡召集人」。我不知道這是甚麼發展網絡，大概如匡智會那種貢獻社會、造福人群的NGO吧？
這個召集人X智偉(個X是想保護這個人，總之X不是弱)在《城市論壇》上指，年輕一輩根本不了解六四事件的本質，就已聲言要去平反，取態並不正確。嘩大佬，而家你班年輕一輩喺度做乜？索K唱K打機上網打online，HEA得就HEA。啲歷史就明明擺晒喺你面前，仲有咁多見證過六四生勾勾嘅人喺度俾你訪問，你哋唔去搵，卻反過來話年輕一輩不了解？你不如話年輕一輩因為懶唔讀書不了解書本的知識就去考會考，係設考試和其他應考人士嘅問題吖。等你班人了解六四事件的本質，等到幾時呀？
話又說回來，要平反不公的判決，點解要等齊你班年輕一輩了解晒先做得？唔好話我話，一陣香港年輕一輩好認識六四，你又話「中國年輕一輩不了解」，講嘢唔會咁好笑呀嘛？中國唔可以公開睇到六四資料架喎。
X智偉又質疑，八九民運前段是愛國運動，提出反貪、反官僚，但及後「外力」介入，令整件事件變質。擔任主持人的謝志峰指不明事件何以變質，X智偉則豎起食指說：「我從來未見過有運動係會派錢，我從來未見過！你夠膽講李卓人無派錢？」
大佬，你從來未見過弱智的人，係咪代表弱智的人唔存在先？還有，李卓人當年梗係有「派錢」，但佢啲錢喺邊度嚟？唔通李卓人富有過李嘉誠？果啲錢咪香港人捐囉。咁你即係話香港人有份做幫兇，令學運變質？咁你即係話當年有份在報章聯署支持兼很有可能捐了錢的曾鈺成、梁振英(下刪數十名人名字，自己在網上找回剪報吧)等係夾埋想推翻中共？
嗱，香港人執生啦，X智偉為株連罪鋪路，邊個捐過錢嘅，自己醒定。
不過X智偉口口聲聲話「派錢」，咁咩叫「派錢」先？每個學生每日支取五百元人工靜坐，叫做派錢；把帳蓬、醫藥或生活必需品等送贈學生，呢啲唔係叫派錢，叫援助。捐啲臨時帳蓬去四川，唔通等於向四川災民派錢呀。2003年七一遊行，幾多熱心人士向市民派水，唔通又等於派錢呀？
弱智人士又會話啦，四川係災難，六四不是，你點可以比。係呀，以上只係講緊乜嘢叫做派錢。而家就講吓，援助呢場運動啱唔啱啦。道理好簡單，當時全球咁多華人願意捐錢，點解呀？因為好多人包括今天好多名人，都好想民運成功，希望中國展開民主新一頁。邊個唔知反貪反腐敗理應支持？尤其香港，當時中國將收回香港已成事實，有腦的香港人都知道，受民主中國統治總好過受泡製「大躍進」、「大饑荒」、「反右」、「文化大革命」(不能盡錄，但這還是短短三十年內泡製)的政權統治啊。可惜，這一場賭局，大家都很想贏，但大家都押錯注，於是便有了移民潮，有了洗底潮，有了轉舦潮，有了歪曲潮了。
X智偉又指，不相信當年學生是手無寸鐵，當時學生領袖柴玲組織二萬名學生和工人「敢死隊」，並指除了平民和學生，解放軍也有人死。
X智偉最出色的，是非常相信「未見過」的事。六四時呢條友唔知係條精蟲定係條鼻涕蟲，肯定未在現場見過當時情況，卻大大聲「不相信」當年學生是手無寸鐵。反而論壇主持人謝志峰，當年在現場採訪，親口力證當時學生手上沒有武器。但X智偉又擺明「不相信」。嘩，咁多記者寫過出來，書都出咗咁多本，你智慧太低懂得選擇性不相信，大家都冇符喎。
話時話啦，唔知點解呢班人成日講解放軍死好多人學生又有武器，硬係冇人出書去「揭露」真相架喎，出來出去都係同一類書嘅。
至於另一位與會者全國政協委員劉夢熊，又有新觀點。他指不是每個港人都支持平反六四，「所謂屠城既不真實，亦缺乏社會共識」。這觀點十分有趣，等於在問：「(某人)所謂弱智既不真實，亦缺乏社會共識。」這是說甚麼？如果這個人弱智是真實，有沒有社會共識都是真實；如果這個人弱智不是真實，社會有共識指他是弱智，「他弱智」也不會變成真實——最多只是社會一群弱智人士心中的一個真實。
唔通劉政協想說「社會缺乏屠城不真實的共識」？但既然不是真實，拿出有力證據來反證便可，證據確鑿，自然有共識嘛。劉政協，請快快上書中央，力陳利害，要求中共開放言論自由，容許民間發掘六四真相，正所謂真金不怕紅爐火，我相信只要開放言論，中共被屈廿年的污名總有一日得到平反，司徒華李卓人等人必遭正法啊。
至於說到屠城問題，劉政協又反問：「前一輪有貨櫃車司機危險駕駛，一撞撞死咗六個人，你可唔可以話個司機係屠城？」我想劉政協不是弱智的，只是中文不太好。任何正常人都知道那種情況叫交通意外。如果有一個解放軍開私家車失控撞死三十人，仍然叫做交通意外；如果他開的是火車，失控撞向另一列火車，死人仲多過六四，仍然叫做交通意外，最多叫交通慘劇，沒有人弱智得稱之為屠城啊。
當然，看過《1984》的也知道，某些國家很喜歡編寫《Newspeak》，說不定有一天軍隊開槍開坦克入城殺人，叫做交通意外也不定。
真估唔到，暗地裏催谷六四集會的人陸續有來。講多無謂，六四維園見。
參考短片:
延伸閱讀(不知不覺寫了這麼多篇六四，是歷年最多，今年真熱鬧)：
在以下影片出現過的人士，你們是先要捐錢才能入場，你們全部都是令運動變質的幫兇。
其他相關文章:
應用什麼來形容呂智偉？(Kursk)
呂智偉:港人捐款使學運變質 (Brucelai) 指鹿為馬 (Nothing New Under the Sun) 甚麼是骨氣？ (肥醫生@西九龍貧民區)
呂智偉再次扭曲歷史 (每日一膠)
何謂屠城 (1-555-CONFIDE)
六四謬論淺析 (方潤日記)
