香港新浪網 MySinaBlog
« 上一篇 | 下一篇 »
diumanpark | 22-Mar-06, 02:02 | 知無不言.蟹無不拑, 港聞刁視 | (3054 Reads)

葉一知

三警互轟案,日日新鮮鑊鑊甘,成為香港人本周最佳現實連續劇。無記收視因而暴跌,正向各大傳媒挖角請編劇。

報紙每日嘅情節離奇新鮮,好睇過X File。自從世貿同政改方案之後,都好耐冇啲咁刺激同有動感嘅新聞,去撩起小市民嘅戲癮。

而且每日嘅新聞都留幾個疑點,例如果日話有酒吧神秘電話,轉頭又話徐梁曾共事,尋日話做乜咁神奇曾國恒開完槍仲可以插番支槍,今日就問點解徐咁傻以一敵二。日日有戲癮位,都咪話唔好睇。

最正係,一向市場主導嘅生果報,深知廣大市民近年變晒師奶死八公,極之鍾意睇玄學家,於是由第一日開始,一連幾日,又有肥靈靈睇相,又有徐步高嘅簽名分析,又有鬼槍編號藏凶兆,準到爆囉。

相信嚟緊幾日,一眾克思現代火派玄學家,將會大展神威,用測字、塔羅牌、流年八字、三世書、姓名學、血型、星座、風水、碟仙、問米等等方式去解開呢單港版X File之謎。

而警方更會力邀眾玄學家加盟,創立港版未來報告(Tom Cruise果套),利用一眾玄學家嘅神奇力量,去搵出將來會犯罪嘅疑犯,喺佢未犯案之前立即將之拘捕。盛世太平,指日可待。

而一眾編輯亦會繼續努力,務求把劇情推進到衛斯理層次。好快就會發現,原來三個警察當時只係俾外星人以無線電束嘅形態入侵,簡單嚟講即係上身,目的係為左做一個「接通人類思想」嘅實驗,最後佢地完工之後,發現地球人智慧太低同不宜外星人居住,唯有透過魚眼鏡返回太空。「插回槍袋」、「以一敵二」、「魚眼鏡移動」等謎團,解開晒,話都冇咁快。

另一份方向報,同樣無得頂。3月18日那篇社評,笑到碌晒地。講多無謂,就引最後果兩段,等大家開心下:

「事實上,近年來警隊成員的操守大有問題,違紀犯案的比例比前有顯著增加。最近高階警官出現問題的新聞不絕於耳,其他貪污瀆職、拖欠巨債的事也時有所聞,這已經是不能不重視的事情。故警隊有必要對所有警務人員的行為和操守來一次大檢閱,以求保證每一名警務人員都能以清白之身,去肩負起他們儆惡鋤奸、維護法紀的光榮職責。

另一方面,當社會需要加強安全保障時,社會上有些人士,卻以提倡人權為名,反對某些對維護社會安全有重大作用的法例的通過,也是令人感到不安的。因為,在他們保護個人權益的同時,也出賣了社會利益,個人私隱和人權受到過分的保護,卻令社會安全暴露在危險之中。因此,我們不能片面的相信這些漂亮的口號,而要更為全面的考慮香港社會的實際情況,作出更聰明更理智的選擇,別讓人權的口號傷害了人權,讓私隱的條例妨礙了私隱,讓西方社會的虛偽當成社會的法紀,讓無恥政客的騙術取代了強政勵治的精神!」

「讓私隱的條例妨礙了私隱」,真係無得頂,我諗左好耐都唔明呢句野點解,各位高人請指教。