葉一知
話說，我今日去左嶺南大學講港男港女。我形容公主病嘅特質係三句話十二個字：大條道理，蠻不講理，亂發脾氣。
我當場舉了個例，有一個女仔去食飯，點左一客咖喱雞飯，跟住佢發現，碟咖喱係辣嘅，咁辣嘅會影響佢嘅皮膚，會爆瘡，梗係唔食得。咁點算好？去投訴。因為佢係客人，你打開門做生意，佢有要求，你做唔到，佢梗係大條道理投訴啦。
好啦，跟住個女仔就叫個short manager埋嚟，唔係，係shop manager，同佢講，碟咖喱係辣架喎，咁個經理梗係O晒嘴啦，就同個女仔講：小姐，咖喱係辣架喎。咁個女仔開始蠻不講理啦：咩咖喱係辣呀，我就係喺第二間食過啲咖喱係唔辣架。咁個經理好無奈，唯有話：小姐，我地嘅官方咖喱係辣架。
個女仔就由蠻不講理，升級為亂發脾氣：我唔知咩叫官方咖喱，我食到嘅味道就係事實，你而家換唔換俾我？你唔換俾我我就拍低你個樣，放上YOUTUBE，然後向各大傳媒投訴你。
呢個故事，我係上個星期度，但因為打風，個talk順延一星期。估唔到一個禮拜都唔夠，就出左元朗聯興行單嘢。當然，上述故事某啲對白我根據片段修改過。但係個core冇變，唔知係我勁，定係啲港女夠典型。
不過話時話，個女仔依家都夠慘架啦，都無謂落井下石。有啲網上特別激動份子，話要殺人全家，又話要逼到人跳樓殺一儆百。大佬，一個蠻不講理嘅小女孩啫，使唔使咁盡呀，果啲真係殺人全家嘅獨裁政權，又唔見你出嚟咁激講句話？真係小事獅吼，大事鵪鶉。
P.S. 在此順道向有關工作人員和各位出席的同學致謝。
